ՎՍՀ-ում Հայաստանի Հանրապետության դեսպան Վահրամ Կաժոյանի աշխատանքային այցը Վիետնամի Տույեն Քուանգ նահանգ:

03 սեպտեմբերի, 2022

Ս.թ. սեպտեմբերի 3-ից 5-ը Վիետնամի Սոցիալիստական Հանրապետությունում ՀՀ դեսպան Վահրամ Կաժոյանն (Vahram Kazhoyan) աշխատանքային այցով գտնվում էր Վիետնամի Տույեն Քուանգ նահանգում:

Այցի շրջանակներում դեսպան Կաժոյանը ներկա գտնվեց մի շարք միջոցառումների՝ Վիետնամի Թայ, Նունգ և Թհաի էթնիկ խմբերի թեն երաժշտության՝ ՅՈՒՆԵՍԿՕ-ի Ոչ նյութական մշակութային ժառանգության ցանկում ընդգրկման ՅՈՒՆԵՍԿՕ-ի վկայականի հանձնման հանդիսավոր արարողությանը, 2022 թվականի Թհան Տույեն փառատոնին, Տույեն Քուանգ նահանգի զբոսաշրջության ներդրումների խրախուսման համաժողովին և Տույեն Քուանգ նահանգի խոհանոցի և զբոսաշրջային արտադրանքների ներկայացման փառատոնին։ Այցի շրջանակներում ՀՀ դեսպանը հարցազրույցներ տվեց պետական ու նահանգային մի շարք լրատվամիջոցների:

ՎՍՀ-ում ՀՀ դեսպան Վահրամ Կաժոյանն այցի շրջանակներում նաև հանդիպեց Տույեն Քուանգ նահանգի նահանգային ժողովրդական կոմիտեի նախագահ Նգույեն Վան Սոնի հետ: Հանդիպման ժամանակ կողմերը քննարկեցին Հայաստանի և Վիետնամի, մասնավորապես Տույեն Քուանգ նահանգի միջև տնտեսական, ինչպես նաև երկուստեք հետաքրքրություն ներկայացնող ոլորտներում համագործակցության զարգացմանն ու խորացմանը վերաբերող հարցեր:

Զրուցակիցները գոհունակությամբ երկուստեք ընդգծեցին Հայաստանի և Վիետնամի միջև քաղաքական ոլորտում առկա բարձր մակարդակը և միջազգային կազմակերպություններում սերտ համագործակցությունը։

Հանդիպման ժամանակ կողմերը պայմանավորվածություններ ձեռք բերեցին քայլեր ձեռնարկել երկու երկրների միջև առևտրա-տնտեսական ոլորտում համագործակցության խթանելու ուղղությամբ։ Մասնավորապես ՎՍՀ-ում ՀՀ դեսպան Վահրամ Կաժոյանն առաջարկեց Տույեն Քուանգ նահանգի գործարարներին և ձեռնարկությունների ներկայացուցիչներին մասնակցել 2022 թ. տարեվերջին Հայաստանում կայանալիք հայ-վիետնամական երկրորդ միջկառավարական նիստի զուգահեռ անցկացվելիք գործարար համաժողովին։

Տույեն Քուանգ նահանգ կատարած այցի ընթացքում կայացած միջոցառումներին դեսպան Կաժոյանին ուղեկցում էր ՀՀ դեսպանության երկրորդ քարտուղար Արամազդ Մուրադյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր